الحب كله حبيته فيك، الحب كله
وزماني كله انا عشته ليك، زماني كله
حبيبي قول للدنيا معايا ولكل قلب بدقته حس
يا دنيا حبي وحبي وحبي ده العمر هو الحب وبس
واسقيني واملا واسقيني تاني. من الحب، منك، من نور زماني
اسقيني ياللي من يوم ما شفتك حسيت كأني اتخلقت تاني
روح قلبي يا حياة أيامي
يا حبيبي يا ملاك أحلامي
أنا كنت ايه قبل ما أشوفك، أنا كنت ايه
وكنت عايش يا حبيبي ايامي ليه، ايامي ليه
طريق حياتي مشيته قبلك في ليل طويل
لا قلب جنبي يحس بيا ولا طيف جميل
ولما شفتك. اول ما شفتك
بكل شوق الدنيا لقيتني مشدود اليك
وفي كل حب الدنيا ناديتك وجريت عليك
ناديت ناديت عالدنيا بحالها، ولكل قلبي بدقته حس
يا دنيا حبي وحبي وحبي، ده العمر هو الحب وبس
الهوى العطشان، عطشان في قلبي بيندهك
يا أرق من النسمة وأجمل من ملك
انت روحي وكل عمري ونور حياتي
يا حياتي، ايه أنا بالنسبه لك؟
حبيبي، ده انا مخلوق علشانك
يا دوب علشانك، علشانك انت
وقلبي، عاش على لمس حنانك
يا دوب حنانك، حنانك انت
حلوة الأيام، حلوة الأحلام، حلوة حياتي
حلوة يا سلام، بتمر قوام، ويا حياتي
يا زمان، يا ليالي طويلة احلامها جميلة محال تنعاد
يا زمان، يا ليالي بتجري بتطوى اماني وتفوتنا رماد
فيها ايه لو تنسى اثنين في الحب دايبين عايشين
عايشين نقول للدنيا بحالها والكل قلبي بدقته حس
يا دنيا حبي وحبي وحبي ده العمر هوه الحب وبس
يا حبيبي يا عبير الشوق يا حبيبي
يا نصيبي من ليالي الشوق يا حبيبي
شعر ايه ده الكلام اللي ف عنيك خلا احلى كلام يغير
عطر ايه ده العبير اللي ف ايديك بيقول ايديك هيا العبير
من الربيع اللي ف شفايفك لليالي اللي ف عنيك
من اللهيب اللي ف خدودك للحنان اللي ف ايديك
رحلة تاهت روحي فيها وتهت فيها
خبيني من الزمن خبيني وبعيد عن عيونه داريني
عالفرحه الكبيره يا خوفي لا ياخدها ولا يخليني
خلينا نقول للدنيا بحالها ولكل قلبي بدقته حس
يا دنيا حبي وحبي وحبي دا العمر هوه الحب وبس
—
غناء أم كلثوم
انتاج 1971
المؤلف أحمد شفيق كامل
الملحن بليغ حمدي
998